នៅក្នុងអត្ថបទមុន Plan-B បានសរសេរអត្ថបទមួយរួចមកហើយលើប្រធានបទ
“តើអ្នកត្រូវធ្វើដូចម្ដេចដើម្បីការពារ Facebook Account របស់អ្នកពីពួក Facebook Hacker បាន? ដែលនៅក្នុងប្រធានបទនេះ មានបួនចំណុចសំខាន់ៗដើម្បីការពារគណីហ្វេសប៊ុករបស់អ្នកឱ្យមានសុវត្ថិភាព ហើយក្នុងចំណោមទាំងបួនចំណុចនោះមានមួយចំណុចសំខាន់ជាងគេ “អំពីលេខសំងាត់ (Password) គណនី” ។
សម្រាប់ថ្ងៃនេះដែរ យើងត្រឡប់មកម្ដងទៀត ដើម្បីបកស្រាយលម្អិតថា តើអ្នកត្រូវធ្វើដូចម្តេចដើម្បីបង្កើតលេខសម្ងាត់មួយដែលអាចធានាបានសុវត្ថិភាពខ្ពស់បំផុត។
នៅពេលដែលអ្នកបង្កើតគណនីហេ្វសប៊ុកថ្មីមួយ ឬចង់ផ្លាស់ប្ដូរលេខសំងាត់នៅក្នុងគណនីចាស់របស់អ្នកដែលមានស្រាប់ ដែលអ្នកគិតថាវាមិនមានសុវត្ថិភាព អ្នកត្រូវប្រាកដចិត្ដថាលេខសម្ងាត់របស់អ្នកត្រូវមានចំនួន ៨ ខ្ទង់។ ហើយនៅក្នុងចំណោម ៨ ខ្ទង់នោះត្រូវមានប្រភេទអក្សរខ្លះ លេខខ្លះ សញ្ញាជារូបភាពខ្លះ អក្សរធំខ្លះ អក្សរតូចខ្លះ និងអ្វីផ្សេងទៀតដាក់លាយឡំគ្នា ដែលអ្នកអាចវាយចូលបានតាមរយៈក្ដារចុចរបស់អ្នក។
ម្យ៉ាងវិញទៀត ហេ្វសប៊ុកនឹងលោតសញ្ញាបញ្ជាក់ប្រាប់អ្នកឱ្យដឹងបានថា តើលេខសម្ងាត់ដែលអ្នកកំពុងតែដាក់មានមានសុវត្ថិភាពគ្រប់គ្រាន់ហើយឬនៅ។ ហើយនៅពេលដែលអ្នកទទួលសញ្ញាពណ៌ក្រហមដែលបញ្ជាក់ថា មិនទាន់មានសុវត្ថិភាពទេ អ្នកត្រូវព្យាយាមច្របល់លេខសំងាត់របស់អ្នកបន្ថែមទៀត រហូតដល់វាបង្ហាញថាមានសុវត្ថិភាពហើយ។ ជារួម អ្នកត្រូវតែព្យាយាមដាក់លេខកូដដែលពិបាកបំផុតតាមដែលអាចធ្វើទៅបាន ហើយប្រាកដថានឹងគ្មាននរណាម្នាក់អាចទាយដឹងបានក្រៅពីរូបអ្នក។
សម្រាប់ចំណុចចុងក្រោយដែលអ្នកគួរចាំទុកក្នុងចិត្ដជានិច្ចនោះ គឺថាអ្នកមិនត្រូវយកលេខសម្ងាត់ក្នុងគណនីហ្វេសប៊ុកអ្នកទៅប្រើក្នុងកម្មវិធីអនឡាញផ្សេងឡើយ ដូចជា E-mail, គណនីធនាគារ, និងកម្មវិធីផេ្សងៗទៀតដែលអ្នកកំពុងប្រើប្រាស់ទេ។
